ceerigaabo (Xisbiga Waddani) Musharaxa Madaxweyanaha Xisbiga Rejada Shacabka ee Waddani oo Safar Dhanka Cirka ah Ku Tegay Ceerigaabo, Kumanaan Taageerayaal ahna kala hadlay Fagaare ku yaala Ceerigaabo.
Musharaxa Madaxweynaha Xisbiga Rejada Shacabka ee Waddani Dr. Cabdiraxmaan Maxamed Cabdilaahi (Cirro) oo uu weheliyo Gudoomiyaha Xisbiga Waddani, Xirsi Cali xaaji Xasan. oo ku guda-jira ololaha maalintii ugu dambaysay ee Xisbiga Waddani ayaa safar dhanka cirka ah ku tegay magaalada Ceerigaabo halkaasi oo musharaxa si ballaadhan loogu soo dhaweeyeyfagaaraha Khayriyada Ceerigaabo. Kumanaan ka mid ah taageerayaasha Xisbiga Waddani ayuu Musharaxa kala hadlay fagaaraha Khayriyada.
Guddoomiyaha Xisbiga Rejada Shacabka , Xirsi Cali Xaaji Xasan, Maayarka Magaalada Ceerigaabo, Ismaaciil Xaaji Nuur, iyo Masuuliyiin kale waxay dhammaantood taageerayaasha uga mahad celiyeen muujinta taageerada baaxada leh ee ay u muujiyeen Xisbiga Waddani, sidoo kalena waxa ay ugu baaqeen in sidaa ay maanta u muujiyeen taageeradooda ay maalinta codayntana ugu hagar baxaan Xisbigooda.
Ugu Danbayntiina Musharaxa Xisbiga Rejada Shacabka ee Waddani Dr, Cabdiraxmaan Maxamed Cabdilaahi (Cirro), oo la hadlay taageerayaasha Xisbiga Waddani ee u sugnaa Fagaaraha Kheyriyada Ceerigaabo ayaa uga mahadnaqay muujinta cududdooda ballaadhan islamarkaana hoosta ka xarriiqay in xamaasadda iyo is muujintu ay tahay mid lagu yaqaanno Taageerayaasha Isbedel doonka ah ee Waddani.
