Gabiley iyo Saaxil kaga qayb-galay Kaltanka Ololaha Xisbiga

Musharraxa Madaxweyne ee xisbiga isbadel-doonka ee WADDANI, Dr Cabdiraxmaan Maxamed Cabdillaahi Cirro iyo ku-xigeenkiisa Maxamed Cali Aw Cabdi ayaa maanta lugtii koobad ee kaltanka ololaha doorashada Madaxtooyada iyo ururadda iskaga gud-bay oo ku soo maray saddex-da Gobol ee Awdal, Gabiley iyo Saaxil ,halkaas oo ay khudbado ruxay oo kiciyey quluubta iyo darreenka guud ee shacabka reer Somaliland ay ka jeediyeen fagaarayaasha Magaallooyinka, Boorama,Dilla, Gabiley iyo Berbera.

Musharraxa Madaxweyne ee Xisbiga rejadda shacabka Dr Cabdiraxmaan Cirro ayaa saaka gaadhay xarunta Gobolka Awdal ee Boorama,halkaas oo uu kaga qayb-galay isu soo bax ballaadhan oo ay tageerayaasha Xisbigu ku muujinayeen kuna soo bandhigeen cududood tageero ee Xisbiga,waxaanu ka jeediyey Musharraxu Khudbad qiimo baddan,isagoo si kal iyo laab ah ugu mahadceliyey tageerayaasha sharfan ee Xisbiga ee ku dhaqan Magaalada Boorama iyo guud ahaan-ba Gobolka Awdal sida mil-gaha iyo maamuuska leh ee ay u soo baxeen una muujiyeen cududooda taageero ee ay u hayaan Musharraxa Madaxweyne ee Xisbiga iyo ku-xigeenkiisa iyo weliba Xisbiga rejada shacabka ee WADDANI

Sidoo kalena Musharraxa Madaxweyne ee Xisbiga WADDANI Dr Cabdiraxmaan Cirro iyo Musharrax ku-xigeenka Xisbiga Amb Maxamed Cali Aw Cabdi ayaa soo gaadhay Degmadda Dilla,halkaas oo kula hadleen tageerayaasha ee isugu soo baxay fagaaraha Magaalada,kuwaas oo ku boggaadiyey sida ay u muujiyeen tageeradda ay u hayaan Musharraxiinta Xisbiga WADDANI iyo weliba Xisbiga

Geesta kalena Musharraxa Madaxweyne ee Xisbiga Dr Cabdiraxmaan Maxamed Cabdillaahi Cirro iyo ku-xigeenkiisa ayaa soo gaadhay xarunta Gobolka cagaaran ee Gabiley,halkaas oo ay kumanaan kun oo tageerayaasha Xisbigu ay ku muujinayeen cududooda taageero,waxaana ay Musharraxa iyo ku-xigeenka Xisbigu ay u mahadnaqeen tageerayaasha Xisbiga ee Gobolka Gabilyey sida ay u muujiyeen darreenkooda iyo doonistooda is-baddelka ay u heelan yihiin.

Ugu Dambeyntii Musharraxa Madaxweyne ee Xisbiga iyo ku-xigeenkiisu iyo weftiga ay hoggaaminayeen ayaa gaadhay xarunta Gobolka Saaxil ee Magaalada Berbera,taas oo ay ilaa xalay iyo saaka ay ka dabeel-degayeen tageerayaasha Xisbiga oo sugayey Musharraxiinta Xisbiga,kuwaas oo muujiyey awodooda iyo tageerada baaxada leh ee ay u hayaan Musharraxa Madaxweynaha iyo Madaxweyne ku-xigeenka Xisbiga iyo weliba Xisbiga,waxaana xusid muddan in Musharraxa Madaxweyne ee Xisbiga WADDANI Dr Cabdiraxmaan Cirro iyo Musharraxa Madaxweyne ku-xigeenka Xisbiga Amb Maxamed Cali Aw Cabdi ay halkaas ka jeediyeen khudbado qiimo baddan,kuwaas oo u mahadceliyey tageerayaasha Xisbiga ee Gobolka Saaxil.