Eng Cabdirisaaq Wiiwaa oo beelaha Cabdi-Ciise iyo Bahwadaagtoodu u xusheen in uu ku metelo Golaha Deegaanka, waxa si weyn hankiisa iyo hawl karnimadiisa u bogaadiyay haldoorka, madax dhaqameedka iyo madaxda xisbiga WADDANI ee madasha ka qayb gashay waxaana si weyn loogu ammaanay doorka muuqda ee uu ka qaatay dhismaha jidka isku xidha Hargeysa iyo Sallaxley oo uu bud-dhig u ahaa.
Guddoomiyaha ayaa si weyn u soo dhaweeyay musharraxnimada Eng Cabdirisaaq waxaanu ku tilmaamay in uu yahay shakhsi ku haboon ka shaqaynta caasimadda, isaga oo bulshada ku boorriyay in ay dad tayo leh u xushaan Goleyaasha Qaranka kana faa’iidaystaan fursaddan muhiimka ah ee doorashada Xildhibaannada Goleyaasha Wakiillada iyo Deegaanka.
